WAZIRI KAIRUKI ATEMBELEA MAONESHO YA MAZAO YA MISITU SAME

Posted on: March 20th, 2024

Waziri wa Maliasili na Utalii, Mhe. Angellah  Kairuki ametembelea mabanda ya Maonesho ya mazao ya Misitu yaliyopo kwenye viwanja vya Shule ya Sekondari Same ukiwa ni kuelekea kilele cha Siku ya Misitu Duniani na Siku ya Upandaji Miti Kitaifa Machi 21,2024.

Mhe. Kairuki ameipongeza Wizara pamoja na Wadau wa misitu waliojitokeza kwa ajili ya kutoa elimu kuhusu majukumu yanayotekelezwa na taasisi zao ikiwemo elimu ya uhifadhi pamoja na kuonesha bidhaa mbalimbali zinazozalishwa na mazao ya misitu.

Pia Waziri ametumia fursa hiyo kuwataka wakazi wote wa Wilaya ya Same,  Mkoani  Kilimanjaro  pamoja na Mikoa ya jirani kujitokeza kwa wingi kutembelea maonesho hayo.

Amesema  maonesho hayo ni  muhimu kwao kwani wataweza kujifunza masuala mbalimbali ikiwemo elimu ya ufugaji nyuki kibiashara pamoja na kujua fursa mbalimbali zinazopatikana katika mnyororo wa thamani ya mazao ya misitu.

Kilele cha Maadhimisho ya Siku ya Misitu Duniani na Siku ya Upandaji miti Kitaifa hufanyika kila mwaka Machi 21ambapo kwa mwaka huu  Tanzania inaadhimisha Kilele hicho  kwa  kupanda miti  pamoja na kutembelea maonesho ya bidhaa mbalimbali zitokanazo na  misitu na nyuki.

Kilele cha Maadhimisho ya siku ya Misitu Duniani na siku ya upandaji Miti Kitaifa yatafanyika Wilayani Same Machi 21 mwaka huu na Mgeni Rasmi atakua Makamu wa Rais wa Jamhuri ya Muungano wa Tanzania Mheshimiwa Dkt.Philip Isdor Mpango.