WAKULIMA WASHAURIWA KUTUMIA MBEGU MPYA YA KAHAWA YA ARABICA COMPACT

Posted on: August 7th, 2024

Wakulima wa Kahawa Wilayani Same wameshauriwa kubadilika kutoka kutumia mbegu za zamani ambazo zinachelewa kukomaa na kuanza kutumia mbegu zilizoboreshwa za Arabica Compact.

Akizungumza kwenye maonesho ya Nane nane Kanda ya Kaskazini Mshauri wa Kilimo wa Halmashauri ya Wilaya ya Same Bw.Fidel Bigula amesema mbegu ya Arabica Compact ni mbegu mpya ambayo inazaa ndani ya miaka mitatu tangu ioteshwe na inazaa sana kuliko mbegu za zamani.

“Mbegu hii imeboreshwa na watafiti kutoka Kituo cha Utafiti wa Kahawa TACRI ambapo tangu imeanza kusambazwa imeonyesha mafanikio kwa wakulima” alisema

Alisema kwa Wilaya ya Same Tayari mbegu hiyo imesambazwa katika Kata mbalimbali na inaendelea kusambazwa ili kuhakikisha wakulima wote wanaachana na mbegu za zamani ambzo zina gharama kubwa ya kuzihudumia na uzao wake ni mdogo.

Bw.Bigula alisema mbegu ya Arabica Compact hutoa hadi kilo tano katika mchumo mmoja tu  kwenye shina moja wakati mchumo mmoja wa mbegu za asili haufiki hata kilo tatu.